Përballë temperaturave të larta që pritet të arrijnë deri në 40°C në ditët në vijim, Bashkia e Korçës ka ngritur nivelin e gatishmërisë për përballimin e çdo situate emergjente, duke paralajmëruar për rrezikun në rritje të zjarreve në pyje dhe zona rurale.
Përmes një njoftimi të publikuar në faqen zyrtare, Bashkia u bën thirrje të gjithë banorëve të tregojnë kujdes të shtuar, sidomos të moshuarve dhe personave me probleme shëndetësore. Autoritetet rekomandojnë shmangien e ekspozimit në diell gjatë orëve më të nxehta të ditës dhe ndalimin e përdorimit të zjarrit në ambiente të hapura.
Gjithashtu, qytetarët ftohen të raportojnë menjëherë çdo rast tymi apo zjarri në numrat emergjentë 128, 112, 129 ose pranë Policisë Bashkiake në numrin 0677175215.
“Respektimi i masave parandaluese është përgjegjësi e përbashkët dhe jetike për sigurinë e të gjithëve”, thuhet në njoftim.
