Korçë/Dëmet në mollë dhe inspektimet me lugë bos
Gjatë 24 orëve të fundit me qindra fermerë në Devoll, Qatrom dhe zona të tjera të juglindjes u dëmtuan masivisht nga stuhia e breshërit e rënë një ditë më parë.
Të dëshpëruar fermerët dolën në media dhe treguan se si mundi i një vitit të tërë shërbimesh dhe kujdesi iku në pak minuta shi dhe breshër, i cili shkatërroi 90% të prodhimit.
Sipas fermerëve, prodhimi nuk është më për në treg dhe se mund të shkojë vetëm për përpunim lëngjesh.
Por si gjithmonë edhe këtë herë fermerët po ushqehen me lugën bosh. Legjislacioni shqiptar nuk parashikon zhdëmtim të tyre në raste fatkeqsish natyrore në asnjë moment, për çdo lloj kulture bujqësore apo frutore, por kjo nuk i pengoi punonjësit e pushtetit lokal Maliq, Devoll apo edhe ata të Prefekturës të dilnin në terren, të shikojnë dëmet dhe t’iu rrahin shpatullat fermerëve duke thënë se: “Do bëjmë gjithçka mundemi t’iu ndihmojmë”.
Por vetëm kaq, sepse nuk do mund të bëjnë asgjë më shumë, pasi siç thashë më lart, ligji nuk parashikon zhdëmtim.
E vetmja mënyrë është të sigurohen parcelat në kompani sigurimi, por specialistët thonë se askush nuk e merr përsipër këtë sigurim, pasi kompanitë nuk kanë leverdi nga dëmi i përvitshëm që shkaktohet në fushën e Korçës dhe Maliqit.
Pra, në këtë rast fermerët ngrohen në diell. Ka edhe një formë tjetër që trumbetohet, eqë është mbulimi me rrjeta i parcelave me mollë, por në qindra fermerë në juglindje investim të tillë mbi 20 milionë lek vetëm me kokrra janë ata që mund ta arrijnë, ose duhet të futësh kokën në bankë.
Deri tani nuk ka asnjë nismë ligjore që shteti apo Ministria e Bujqësisë të ndërhyjë në sigurimin e prodhimit, prandaj fermeri është i destinuar të ushqehet thjeshtë me lugën bosh. Të shërbejë me mund dhe djersë, të sigurojë vetë tregun dhe në fund edhe kur dëmtohet të mbajë veten në qafë.
