Drejtoria Vendore e Policisë Korçë vijon kontrollet intensive në të gjithë territorin e qarkut, me fokus evidentimin dhe goditjen e veprimtarive të kundërligjshme të lojërave të fatit. Në kuadër të operacionit policor të koduar “Qarku”, janë konstatuar dhe goditur 4 raste të tjera, duke çuar në procedim penal 4 shtetas në Korçë dhe Pogradec.
Gjatë kontrolleve të ushtruara në ambiente të ndryshme, shërbimet e Komisariatit të Policisë Korçë referuan materialet në Prokurori për shtetasit J. A., P. A. dhe Th. B., banues në Korçë, pasi në celularët e tyre u gjetën faqe aktive për baste sportive.
Ndërkohë, shërbimet e Komisariatit të Policisë Pogradec proceduan penalisht shtetasin R. Gj., 28 vjeç, banues në Pogradec, i cili u kap në një lokal me faqe bastesh sportive të hapura në celularin e tij.
Në cilësinë e provës materiale, Policia sekuestroi 4 celularët, ndërsa materialet procedurale iu referuan Prokurorisë së Korçës për veprime të mëtejshme.
Kontrollet vijojnë në të gjithë qarkun me qëllim parandalimin dhe ndëshkimin e çdo forme të veprimtarisë së paligjshme të lojërave të fatit.
