Drejtoria Vendore e Policisë Korçë ka referuar materialet procedurale në Prokurori, duke nisur procedime penale ndaj disa shtetasve të përfshirë në vepra të ndryshme penale, në qytetet Korçë, Pogradec, Devoll dhe Maliq.
Në Korçë, nisi procedimi penal për shtetasit K. L., 23 vjeç dhe E. K., 46 vjeç, të dy banues në Korçë, pasi dyshohet se kanë goditur me grushte një 22-vjeçar, për motive të dobëta. Gjithashtu, është proceduar penalisht shtetasi A. A., 63 vjeç, banues në fshatin Lumalas, pasi në banesën e tij është konstatuar një lidhje e paligjshme e furnizimit me ujë.
Në Pogradec, janë proceduar shtetasit E. Ç., 28 vjeç, banues në Pogradec, i dyshuar për kanosje verbale ndaj një punonjësi institucioni publik për shkak të detyrës, si dhe M. B., i cili u kap duke kryer punime ndërtimi pa leje.
Në Devoll, procedimi penal është regjistruar për shtetasin A. P., 65 vjeç, banues në fshatin Tren, i dyshuar se ka kanosur verbalisht një 42-vjeçare për motive të dobëta.
Ndërkohë, nga Specialistët për Hetimin e Krimeve të Drejtorisë Vendore për Kufirin dhe Migracionin Korçë, janë referuar materialet për shtetasit S. Sh., 51 vjeç, banues në Maliq, S. Sh., 69 vjeç, banues në Tiranë, dhe L. P., 30 vjeç, banues në Dibër, për veprën penale “Kalimi i paligjshëm i kufirit shtetëror”.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
