Dega e Partisë Demokratike në Maliq dhe drejtuesit e Partisë së Lirisë kanë prezantuar si kandidat për kryetar bashkie në Bashkinë e Maliqit dr.Alfred Gegën.
Dr. Gega ka një jetë politike aktive në këtë forcë politike dhe jo më larg se zgjedhjet parlamentare të vitit 2021 ai kandidoi si deputet. Në rang qarku ai arriti të merrte 2829 vota, nga të cilat 920 prej tyre i mori në Bashkinë e Maliqit.
Alfred Gega është mjek me profesion, kirurg-ortoped-traumatolog.
Ka studiuar mjekësi, ka kryer specializim pasuniversitar për “Kirurg-ortoped-traumatolog” pranë QSUT-së, në vitet 1996-2000. Në vitet 2007-2008 ka vijuar me specializim për “Kirurgji ortopedike” në Spitalin e Aviacionit në Athinë, Greqi. Gjithashtu është specializuar për programin EMS, pranë USAID.
Dr. Alfred Gega prej vitesh ushtroi profesionin e tij pranë Spitalit Universitar të Traumës, Tiranë.
Tashmë doktori dëshiron të jetë në qendër të një bashkie për ta menaxhuar atë dhe për të sjellë një frymë të re në zonën e Maliqit.
