Të kalosh kufirin nga Shqipëria drejt Maqedonisë së Veriut tashmë ka muaj që është sfilitëse. Do duhet të presësh nga 30-40 minuta në radhë që tja dalësh të kalosh matanë, qoftë edhe nëse ke menduar të bësh pazare, të pish kafe apo të kalosh fundjavën.
Paraditja e kësaj të shtune ka qenë e tillë në pikën e kalimit kufitar, ku edhe pse punohet me një sportel të përbashkët vonesa është e pashmangshme.
Ndryshe nga pala shqiptare që herë pas here gjatë ditës aplikon procedura të përshpejtuara, pala maqedonase e bën shumë rrallë diçka të tillë e për pasojë përballet çdo ditë me rradhë të gjata.
Qafë Thana këtë sezon veror ka qenë një nga pikat kufitare e cila ka pasur numrin më të lartë të hyrje daljeve ku vetëm gjatë gushtit kanë hyrë e kanë dalë mbi 300 mijë shtetas shqiptarë e të huaj.
