Ndarja nga jeta e Kryepiskopit Anastas Janullatos ka lënë një boshllëk të madh në udhëheqjen shpirtërore të Kishës Ortodokse Autoqefale të Shqipërisë, duke ngritur pyetje për të ardhmen.
Çfarë do të ndodhë tani?
Brenda dy javësh pritet të mblidhet Sinodi i Shenjtë, i cili përbëhet nga 6 mitropolitë. Ata do të votojnë për të zgjedhur Kryepiskopin e ri, sipas rregullave dhe traditave të Kishës Ortodokse.
Në përputhje me ligjet kanonike, Kryepiskopi i ri duhet të jetë një nga mitropolitët ekzistues, dhe zakonisht përparësi ka ai që konsiderohet më i vjetri në shërbim.
Mitropoliti i Korçës, Hirësia e Tij Imzot Joan Pelushi, shihet si kandidati më potencial. Ai ka qenë një bashkëpunëtor i ngushtë dhe mik i Kryepiskopit Anastas, duke i qëndruar pranë deri në momentet e fundit.
Gjithashtu, Patriarkana Ekumenike e Kostandinopojës do të ketë një rol këshillimor, për të siguruar që procesi të zhvillohet në harmoni me traditat dhe kanonet e Kishës Ortodokse.
Kisha Ortodokse Autoqefale e Shqipërisë është në një moment kritik, ku udhëheqja e re do të ketë një detyrë të rëndësishme për të mbajtur të gjallë trashëgiminë shpirtërore të Kryepiskopit Anastas dhe për të vazhduar misionin e tij të shërbimit.
