Policia e Korçës ka evidentuar disa raste shkeljesh ligjore në qarqet e saj, duke ndërmarrë veprime procedurale ndaj personave të përfshirë. Specialistët për Hetimin e Trafiqeve të Paligjshme ndaluan në Tiranë shtetasin I. D. alias I. L., 41 vjeç, i dënuar nga Gjykata e Korçës me 2 muaj burg për ndihmë në kalim të paligjshëm të kufirit.
Ndërkohë, në Maliq është proceduar penalisht shtetasi Ç. R., i kapur në flagrancë duke kryer punime ndërtimi pa leje. Në Devoll, është marrë e njëjta masë ndaj shtetasit K. K., 25 vjeç, pasi nuk iu bind urdhrit të policisë për të paraqitur dokumentet e automjetit.
Gjithashtu, specialistët e Qarkullimit Rrugor referuan rastin e shtetasit R. K., 63 vjeç, i cili u rrëzua aksidentalisht me biçikletë dhe aktualisht ndodhet jashtë rrezikut për jetën.
Në vijim, është proceduar penalisht edhe shtetasi A. M., 23 vjeç nga Berati, për kalim të paligjshëm të kufirit. Të gjitha materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
