Nga lagjja 16 e qytetit të Korçës, drejtuesi politik i qarkut për Partinë Socialiste, Niko Peleshi, ka bërë thirrje për bashkim rreth një qëllimi të vetëm, anëtarësimin e Shqipërisë në Bashkimin Europian.
Në fjalën e tij, Peleshi i cilësoi zgjedhjet e 11 majit si një moment vendimtar për të ndarë të shkuarën nga e ardhmja. Ai theksoi se këto zgjedhje shkojnë përtej interesave të partive dhe i përkasin interesit kombëtar. “Një votë për Partinë Socialiste është një votë për rrugën e sigurt drejt Bashkimit Europian,” u shpreh Peleshi.
Më tej, drejtuesi politik i qarkut të Korçës nënvizoi se më 11 maj, Korça do t’i japë Partisë Socialiste 7 mandate dhe Shqipëria 84 mandate, në mënyrë që të përmbyllen me sukses reformat që janë kusht për procesin e anëtarësimit.
Në përmbyllje të fjalës së tij, Peleshi përsëriti mesazhin se vota për numrin 5, për Edi Ramën dhe Partinë Socialiste, duhet të jetë masive më 11 maj, për ta bërë të mundur marrjen e “pasaportës europiane” dhe për ta çuar Shqipërinë drejt mbërritjes së destinacionit si e barabartë me vendet e tjera të Europës.
