Sot është dita e tretë e regjistrimeve të diasporës për votimet e 11 majit. Këtu jemi në Selanik, në zyrën e hapur për të mbështetur bashkatdhetarët tanë, ashtu si janë hapur zyra të tjera në Athinë, Janinë, dhe në vende të tjera të botës, për të asistuar emigrantët me procesin e regjistrimit për zgjedhjet.
Jemi në fazën e regjistrimit, e cila ka filluar para dy ditësh dhe përfundon më 1 mars. I inkurajoj të gjithë shqiptarët në mbarë botën që, përmes këtij mesazhi, të regjistrohen dhe të ushtrojnë të drejtën e votës. Kjo është një e drejtë që e kemi kërkuar prej vitesh dhe që, falë përpjekjeve të Partisë Socialiste, është bërë tashmë realitet.
Regjistrimi është një procedurë e thjeshtë, që zgjat vetëm disa minuta. Të gjitha udhëzimet gjenden në faqen e Komisionit të Zgjedhjeve. Pas përfundimit të regjistrimit, bashkatdhetarët tanë në diasporë do të përfshihen në listën e votuesve të diasporës.
Pasi të dalë lista përfundimtare, çdo person i regjistruar do të marrë me postë materialet e votimit, sipas qarkut përkatës. Vota e çdo emigranti do të llogaritet dhe numërohet në kutinë e qarkut, pra në zonën elektorale nga vjen.
Jam shumë i entuziazmuar, pasi këtu në Selanik ka shumë korçarë nga të gjitha bashkitë e Korçës që kanë ardhur në zyrën tonë për të marrë asistencë. Shumë të tjerë mund ta përfundojnë procesin vetë përmes celularit, por ata që ende nuk janë të familjarizuar me procesin mund të vijnë në zyrën tonë, pranë konsulatës shqiptare, dhe të marrin ndihmë nga stafi ynë.
