Në fshatin Panarit u zhvillua një ceremoni e veçantë për të përkujtuar figurën historike të Iljaz Bej Mirahorit, themeluesin e qytetit të Korçës dhe birin e shquar të krahinës së Vakëfeve, në 520-vjetorin e tij. Ngjarja u mbush me emocione, krenari dhe respekt për njeriun që i dha emër dhe identitet të veçantë rajonit.
Atmosfera festive u pasurua me tingujt e kabasë së artistit Aleks Xhelili, fjalimin frymëzues të Astrit Hados, këngën emocionuese të Orgest Kolonjarit, si dhe me vargjet prekëse të recituara nga nxënësit e shkollës lokale.
Përkujtimi përfshiu gjithashtu shfaqjen e dokumentarëve historikë, një panair libri, degustime të ushqimeve tradicionale dhe valle popullore, duke e kthyer këtë aktivitet në një festë të madhe kulturore dhe historike. Organizuar nga Shoqata e Vakëfeve, ceremonia u vlerësua si një sukses i jashtëzakonshëm që ngjall shpresë për ruajtjen dhe promovimin e trashëgimisë kulturore të zonës.
Banorët e zonës dhe të ftuarit shprehën mirënjohjen për organizimin dhe rëndësinë e veçantë të figurës së Iljaz Bej Mirahorit në historinë e Korçës dhe të gjithë rajonit juglindor të Shqipërisë.
