Partia Demokratike do të zhvillojë primaret më datën 1 Mars. Vendimi është marrë në mbledhjen e Kryesisë së PD-së ku është caktuar që gara për përzgjedhjen e kandidatëve për deputetë nga radhët e demokratëve do të jetë në nivel qarku.
Tre propozimet kanë qënë: zhvillimi i primareve në nivel dege të PD, në nivel qarku, dhe kombëtare. Dhe në përfundim u vendos që gara të zhvillohej në nivel qarku. Burime pranë Partisë Demokratike dega Korçë bëjnë të ditur se janë të shumtë emrat që priten të kandidojnë në këto primare duke kërkuar votën e anëtarëve për tu kualifikuar me qëllim përfshirjen në listën e kandidatëve për deputetë për zgjedhjet e 11 majit.
Sa i takon rregullores së primareve, në mbledhjen e kryesisë së PD-së është vendosur që ato të jenë kualifikuese. Pra, secili qark, do të ketë specifikat apo rregulloren e vet, në bazë të numrit të popullsisë, anëtarëve të PD-së, dhe numrit të kandidatëve. Ata të cilët kalojnë pragun pasi secili qark do të ketë një prag, do të kualifikohen dhe emrat e tyre do të shkojnë në Kryesinë e PD-së.
Më pas do të jetë Kryesia e PD që do të vendosë, se cili kandidat do të jetë në listat e mbyllura dhe të hapura. Ky vendim më pas do duhet të kalojë edhe në Keshillin Kombëtar.
