Në kuadër të Ditës së Pedalimit dhe Ditës Botërore të Mjedisit, Bashkia e Pogradecit, në bashkëpunim me Zyrën Vendore të Arsimit Parauniversitar, organizoi një aktivitet sensibilizues me pjesëmarrjen e rreth 50 nxënësve nga shkollat e qytetit.
Me moton “Pedalojmë së bashku”, aktiviteti kishte për qëllim të promovojë biçikletën si një mjet transporti i qëndrueshëm dhe të rrisë ndërgjegjësimin për mbrojtjen e mjedisit. Nxënësit marshuan me biçikleta përgjatë itinerarit Pogradec–Drilon–Pogradec, duke përcjellë mesazhe për një stil jete më të shëndetshëm dhe miqësor me natyrën. Aktiviteti u përmbyll me një vizitë në Qendrën Turistike të Drilonit.
Julika Gjyla, specialiste e rinisë pranë Bashkisë Pogradec, u shpreh se qëllimi i kësaj nisme është të edukojë të rinjtë mbi rëndësinë e mbrojtjes së mjedisit dhe të promovojë zakone të qëndrueshme në përditshmëri.
Ky aktivitet përfaqëson një hap konkret drejt përfshirjes së komunitetit të ri në nisma të qëndrueshme dhe në ndërtimin e një të ardhmeje më të gjelbër për qytetin e Pogradecit.
