Një ngjarje e rëndë raportohet të ketë ndodhur në Greqi, ku një i ri shqiptar ka humbur jetën pas një aksidenti automobilistik në aksin Seksklou – Volos.
Lajmin e kanë bërë të ditur mediat e vendit fqinj, sipas të cilave, aksidenti tragjik ka ndodhur pak para orës 18.00, kur 26 vjeçari Serxho Sula, po kthehej nga Rizomylos, ku kishte shkuar për të ndjekur ndeshjen e futbollit mes Asteras dhe Thereas Agrias.
Motoçikleta me të cilën ai po udhëtonte me gjasë ka rrëshqitur në sipërfaqen e rrugës dhe ka dalë nga rruga, ku si pasojë është përplasur në trotuar, gjë që ka shkaktuar vdekjen tragjike të të riut shqiptar.
Serxho Sula, me origjinë shqiptare, jetonte në Nea Ionia Volos dhe kishte një dobësi të veçantë për motorët.
Një ambulancë e EKAV mbërriti në vendngjarje, por ishte tepër vonë. Sektori i Qarkullimit në Volos po kryen hetimet paraprake për shkaqet e aksidentit dhe zbardhjen e plotë të ngjarjes.
