Një tjetër operacion i suksesshëm është finalizuar nga Drejtoria Vendore e Policisë Korçë, në kuadër të luftës kundër krimit të organizuar, veçanërisht në fushën e narkotikëve dhe armëmbajtjes pa leje. Operacioni, i koduar “Cold Hand”, u zhvillua në qytetin e Pogradecit dhe çoi në arrestimin e një shtetasi me rrezikshmëri të lartë shoqërore dhe të shkuar kriminale.
Në pranga përfundoi shtetasi F. M., 27 vjeç, banues në Pogradec, i dënuar më parë për vepra të rënda penale si “Vrasje” dhe “Vrasje e mbetur në tentativë”. Pas një pune të mirëkoordinuar të shërbimeve të Seksionit për Hetimin e Narkotikëve, Seksionit për Hetimin e Krimeve të Rënda dhe forcave “Shqiponja”, policia ndërhyri duke kryer një kontroll të imtësishëm fizik, të automjetit dhe të banesës së të dyshuarit.
Gjatë operacionit, në banesën e të arrestuarit në lagjen nr. 1 të Pogradecit, u gjetën dhe sekuestruan dy armë zjarri pistoletë, një silenciator, tre krehra me fishekë, një shufër metalike me mbishkrimin “Policia”, një shkop metalik, një pako me lëndë narkotike të dyshuar si kokainë, pesë aparate celularë, dy karta banke, një pasaportë biometrike dhe një shumë e konsiderueshme parash në lekë, euro dhe dollarë australianë. Gjithashtu, u sekuestrua edhe automjeti i përdorur nga i dyshuari.
Materialet procedurale në ngarkim të F. M. iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprat penale “Prodhimi dhe shitja e narkotikëve”, “Prodhimi dhe mbajtja pa leje e armëve luftarake dhe municionit” si dhe “Prodhimi, mbajtja, blerja apo shitja pa leje e armëve të ftohta”.
