Pogradeci ka shpallur që në startin e fazës përgatitore se objektivi i madh për sezonin 2025-2026 është rikthimi në elitën e futbollit shqiptar. Ecuria pozitive në gjysmën e dytë të sezonit të kaluar konsiderohet si një bazë e vlefshme mbi të cilën klubi po ndërton ambiciet e reja.
Në funksion të këtij qëllimi, liqenorët kanë nisur një merkato të studiuar, me synimin për të afruar lojtarë me cilësi dhe eksperiencë ndërkombëtare në çdo repart.
Klubi ka zyrtarizuar dy blerjet e para:
Uillian Henrique dos Santos, mesfushor brazilian 26-vjeçar, i cili pritet të sjellë qetësi, vizion dhe eksperiencë në organizimin e lojës në mesfushë.
Santiago Alfonso Rodriguez Pacheco, sulmues 20-vjeçar nga Venezuela, që shihet si një element premtues për repartin ofensiv.
Të dy prurjet vlerësohen se do t’i japin skuadrës jo vetëm aftësi teknike, por edhe fleksibilitet taktik dhe forcë fizike.
Drejtuesit e klubit kanë paralajmëruar se merkatoja do të vazhdojë me lëvizje të tjera, pasi synimi i Pogradecit është të ndërtojë një ekip që të jetë i denjë për sfidat e Superiores.
