Në qytetin e Korçës është prezantuar një program i ri për zhvillimin dhe financimin e ndërmarrjeve të vogla dhe të mesme, një iniciativë e financuar nga qeveria italiane dhe e administruar nga Ministria e Ekonomisë e Shqipërisë. Qëllimi kryesor i këtij programi është lidhja e kompanive korçare me fondet e investimeve dhe me teknologjitë më të përparuara.
Gjatë prezantimit të programit, Gazril Lasku, Drejtor Ekzekutiv i programit, theksoi mundësitë që ky program ofron për bizneset lokale. Ndërmarrjet e vogla dhe të mesme mund të përfitojnë kredi të butë që variojnë nga 50 mijë deri në 500 mijë euro, si dhe kredi për projekte të vogla që mund të shkojnë nga 15 mijë deri në 50 mijë euro.
Ky program ka pasur një aplikim të suksesshëm në Korçë edhe disa vite më parë, ku 10 biznese të ndryshme përfituan mbështetje financiare. Tashmë, ky program ofron një mundësi të re për zhvillimin e mëtejshëm të biznesit dhe investimin në teknologji të avancuara.
