Vëllazëria Ungjillore Shqiptare kundër eventit të liqenit të organizuar nga ambasada franceze dhe martesës së nesërme të të njëjtës gjini nesër në bashkinë e Tiranës.
Reagimi i plotë;
Nisur nga informacionet që kemi marrë nëpërmjet medias për lajmin e martesës të së njejtës gjini në tarracën e Bashkisë Tiranë, nga dy “pastorë” Britanikë, Vëllazëria Ungjillore e Shqipërisë, informon të gjithë komunitetin Ungjillor, komunitetet e tjera fetare dhe gjithë shoqërinë shqiptare se:
– Së pari, “pastorët” Britanikë të cilët do të zhvillojnë ceremonine martesore nuk janë të njohur nga kisha jonë Ungjillore në Shqipëri.
– Së dyti, të krishterët ungjillorë qëndrojnë fort kundër idesë së martesës së personave të së njëjtës gjini.
Martesa nuk është thjesht një institucion njerëzor, por na është dhënë nga Perëndia. Kjo dhuratë fillon me fillimin e historisë njerëzore me krijimin e Adamit dhe Evës në librin e Zanafillës (Zanafilla 1:28; 2:18-25) dhe vazhdon gjatë gjithë historisë së Biblës.
Sipas Biblës, martesa shugurohet nga Perëndia si bashkimi i përjetshëm i një burri dhe një gruaje (Zanafilla 2:21–24; Mateu19:4–6). Martesa e të njëjtës gjini është një çoroditje e
institucionit të martesës dhe një ofendim për Zotin që krijoi martesën.
Të pranosh martesat e së njëjtës gjini do të thotë të miratosh stilin e asaj jete të cilën Bibla e etiketon qartë dhe vazhdimisht si mëkat.
– Së treti, Kodi i Familjes në Shqipëri, përkatësisht neni 7 thotë se martesa mund te lidhet ndërmjet një burri dhe një gruaje, në këtë mënyrë janë rreptesisht të përjashtuara martesat brënda së njëjtës gjini. Vendimi për të realizuar këtë ngjarje në ambiente të Bashkisë së Tiranës bie në kontradiktë me Kodin e Familjes dhe vlerat e Familjes.
I bëjmë thirrje gjithë shoqërisë Shqiptare që të ngrenë zërin dhe të reagojnë për vlerën e shenjtë të familjes. Kombi ynë e ka ruajtur vlerën e familjes ndër breza. Le të vazhdojmë ta
ruajmë vlerën e saj dhe për gjeneratat e ardhshme që do të vijnë.
Këto janë ditë kur të gjithë të krishterët, veçanërisht pastorët dhe udhëheqësit e kishës, duhet të qëndrojnë të patundur në mësimet Biblike për planin e mirë dhe të bukur të Perëndisë për martesën dhe familjen.
Vëllazëria Ungjillore e Shqipërisë
