Qarku i Korçës është përfshirë nga reshje dëbore gjatë ditës së djeshme dhe natës, me intensitet deri mesatar në të gjithë territorin, të shoqëruara edhe me erë. Trashësia e dëborës në zonat malore varion nga 10 deri në 25 cm.
Përballë kësaj situate, subjektet kontraktore kanë qenë në gatishmëri të plotë, duke kriposur dhe mirëmbajtur akset rrugore kryesore nacionale dhe turistike. Si rezultat, qarkullimi në këto akse vijon normalisht dhe pa probleme.
Bashkitë e qarkut po vijojnë punën për hapjen e rrugëve dytësore, lidhëse dhe shesheve në qendrat e qyteteve. Deri më tani, nga njësitë vendore nuk raportohen problematika.
Nga ana tjetër, për shkak të erës janë shënuar ndërprerje të përkohshme të energjisë elektrike në disa zona. Probleme me furnizimin janë regjistruar në Njësinë Administrative Udënisht dhe Buçimas (Bashkia Pogradec), në fshatin Orman-Çiflig (Njësia Adm. Bulgarec), si dhe në fshatin Dardhë (Njësia Adm. Mollaj, Bashkia Korçë). Po ashtu, mungesë energjie ka edhe në fshatrat Dolenac, Mjaltas dhe Besmirë në Njësinë Adm. Gorë të Bashkisë Maliq, si dhe në 12 fshatrat e Njësisë Administrative Proptisht që furnizohen nga Agjencia Elektrike e Përrenjasit.
Grupet e punës ndodhen në terren dhe po punojnë për riparimin e defekteve.
Institucioni i Prefektit, në bashkëpunim me strukturat e emergjencave civile, vijon monitorimin e situatës në kohë reale.
