Rritja e numrit të aksidenteve në punë në Korçë ka nxitur autoritetet të rrisin vigjilencën dhe masat për garantimin e sigurisë në ambiente pune. Sipas Rina Pëllumbit, përgjegjëses së Sektorit të Inspektimeve në ISHPSHSH Korçë, është e rëndësishme që të respektohen disa rregulla dhe të merren masa të duhura për të reduktuar aksidentet.
“Ka disa masa që mund të merren për të siguruar një ambient pune më të sigurt, dhe një ndërgjegjësim më të lartë nga ana e punëmarrësve dhe punëdhënësve është thelbësor,” tha Pëllumbi.
Ajo theksoi se tashmë ka një vëmendje të shtuar dhe një zbatim rigoroz të masave nga ana e punëdhënësve, për të siguruar mbrojtjen e punonjësve.
Gjithashtu, Pëllumbi shtoi se Inspektoriati Shtetëror i Punës ka një politikë të tolerancës zero ndaj çdo abuzimi, duke realizuar inspektime të shpeshta dhe duke ndërhyrë në rastet e shkeljeve të ligjit për sigurinë në punë.
Ky angazhim është një hap i rëndësishëm për të ulur numrin e aksidenteve dhe për të krijuar kushte më të sigurta pune në Korçë.
