S’ka puntorë apo pagat janë copë copë
Këtë mëngjes një lajm që pritej të ndodhte është mbyllja e fabrikës së prodhimit të Gjergj Lucës në Maliq. Prej muajsh Gjergj Luca ishte me nerva pasi garancia se do të kishte bollshëm krah pune nuk rezultoi e tillë, aq më pak në një qytezë si Maliqi ku njerzit janë mësuar të jetojnë edhe me ndihmë ekonomike.
2 javë më parë një fasoneri falimentoi në Pogradec dhe në mes të rrugës mbetën dhjetra puntorë të cilët po ashtu nuk kishin marrë pagat dhe treguan më pas se nuk iu ishin paguar as sigurimet.
Pra kush ta ketë fajin në këtë mes, puntori apo sipërmarrësi?
Edhe pse ligjërisht në sistemin tatimor bizneset i kanë rritur pagat mesatare siç ua kërkoi qeveria, në fakt nën zë janë me dhjetra puntorë që e hedhin poshtë këtë pagë. Ata thonë se në letra paguhen mirë por në fakt në dorë marrin as më shumë e as më pak diku tek 200-250 mijë lek të vjetra në muaj.
Kjo pasi kompanitë e prodhimit ua matin punën me normë dhe më pas një pjesë e madhe e puntorëve i kthejnë pas paratë që tërheqin në bankë. E gjitha kjo ndodh për të gënjyer në sytë e shtetit se ne paguajmë sa duhet dhe nga ana tjetër puntorët të tmerruar i kthejnë paratë se e gjejnë veten në rrugë.
Nuk është aspak e vështirë të zbulosh një fenomen të tillë, mjafton që inspektorët me këmisha të inspektoriatit të punës të bëjnë si duhet detyrën e tyre.
Por le të dalim tek pagat, nëse dikush merr 300-400 mijë lek në muaj këtu në Shqipëri, e sigurtë që mendon çdo ditë largimin. Dikush mund të thotë po sa do marrësh në Gjermani? Do marrë aq sa të paguajë qeranë, faturat, ushqimin dhe do i mbeten edhe nja 700-800 euro mënjanë për ti mbledhur. Ndërsa me pagat në Shqipëri e sigurtë që do e mbyllësh muajin me borxhe.
Kompanitë e prodhimit nxjerrin shifra marramendëse falë kontratave që kanë jashtë për shitjen e mallit, por as nuk e vrasin mendjen se këto para i fitojnë nga “hamallët” që keqpërdorin në Shqipëri të cilëve iu tundin letrat para syve se i paguajnë 300 mijë lek.
Bëni një llogari nëse je çift i ri me qera dhe merr 700 mijë lek në muaj se sa para mbeten në xhepin e tyre. Asnjë, asnjë dhe do marrin borxh.
Prandaj nuk është faji as i puntorëve të Korçës, Maliqit, Pogradecit, Devollit e Kolonjës që nuk shkojnë të punojnë.
Ata e kanë provuar, janë paguar keq dhe në fund nuk iu thonë as ju lumshin krahët. Ata zgjedhin të jetojnë me ndihmë ekonomike sesa ti shërbejnë pronarëve që lëvizin me Range Rovera dhe që pagën e tyre mujore e prishin për 1 ditë.
Ata zgjedhin të mos iu japin krahë atyre, sa kohë që ata palë me shtetin i poshtërojnë me paga qesharake, të rregullta në sistem por gjithmonë e më pak në dorë.
