Skënderbeu e ka nisur vitin 2026 në mënyrën më të mirë të mundshme, jo vetëm në fushë, por edhe në tregun virtual të vlerësimit të futbollistëve. Skuadra korçare po “fluturon” në Transfermarkt, teksa rritja e ndjeshme e vlerës së lojtarëve e bën Skënderbeun që tashmë të konsiderohet një skuadër superlige për nga vlera financiare.
Rezultatet pozitive të 17 javëve të para të Kategorisë së Parë, ku Skënderbeu kryeson bindshëm dhe është shkëputur nga ndjekësit, kanë reflektuar drejtpërdrejt edhe në vlerësimet individuale të futbollistëve. Në rifreskimin e fundit të bërë nga faqja prestigjioze Transfermarkt, të gjithë lojtarët e skuadrës kanë shënuar rritje të ndjeshme në vlerë.
Në krye të listës qëndrojnë Marko Alia dhe Saleh Nasr, të cilët vlerësohen me nga 350 mijë euro secili, duke qenë aktualisht lojtarët më të shtrenjtë të skuadrës. Pas tyre vjen mesfushori Paolo Estrela, i cili vlerësohet me 225 mijë euro, po aq sa edhe Tayo Abiodun, që konfirmon formën e tij të lartë.
Rritje të konsiderueshme kanë shënuar edhe Randi Dumfor dhe Taryck Tahid me nga 200 mijë euro, ndërsa Kosta Vangjeli, Dejvid Janaqi dhe Salim Abubakar vlerësohen me nga 175 mijë euro secili.
Në total, vlera e të gjithë futbollistëve të Skënderbeut arrin në 3.2 milionë euro, shifër që e rendit skuadrën korçare në nivele të krahasueshme me ekipet e Superligës shqiptare.
Me këto shifra dhe me ecurinë në kampionat, Skënderbeu po konfirmon ambiciet për rikthimin aty ku e ka vendin, ndërsa vlera në rritje e skuadrës është një tjetër tregues i projektit serioz të ndërtuar në Korçë.
