Skënderbeu pret edhe këta tre futbollistë që do të vijnë nga dita në ditë dhe më pas merkatoja për bardhekuqtë do të quhet e mbyllur.
Këtë lajm e bën të ditur për Kolibri.al vetë trajneri i Skënderbeut, Ivan Gvozdenoviç.
Madje, njëshi i stolit thotë se nëse vijnë edhe këta tre lojtarë që janë të mbyllur që do të jenë me Skënderbeun, por që thjesht janë procedurat deri në momentin që të vijnë në qytetin juglindor, atëherë nuk ka se çfarë të pritet më, pasi grupi do të jetë i plotë.
Tre futbollistët që do të vijnë janë, sulmuesi Zhordan Fleçer, mbrojtësi Randi dhe sulmuesi tjetër Alfred Mensah.Xhamajkani, Zhordan Fleçer ka ditë që e ka mbyllur kontratën, madje ka firmosur dhe pritet të udhëtojë nga Xhamajka në drejtim të Korçës. Është një sulmues me shumë vlera që do të jetë një pikë kyçe për Skënderbeun e superligës.
Ndërkohë që vetëm viza mungon për Fleçer që të udhëtojë drejt Shqipërisë, për Randin mund të themi se nga momenti në moment edhe ai pret “ok”-in për të udhëtuar dhe për tu bashkuar me Skënderbeun. Randi është një pikë kyçe e do ta mbushë edhe më shumë Skënderbeun, sidomos në prapavijë.
Përsa i përket Alfred Mensah, edhe me sulmuesin në fjalë gjithçka është mbyllur dhe tashmë pritet vetëm “ok”-i që duhet të marrë nga Partizani që do të vazhdojë të luajë në Europë, për të udhëtuar drejt Korçës.
Me pak fjalë, Fleçer, Randi dhe Mensah mbyllin merkaton e Skënderbeut.
