Në kampin e Skënderbeut, roli i portierit është kthyer këtë sezon në një nga dilemat më të mëdha për stafin teknik. Klubi korçar ka aktualisht në organikë plot katër portierë, duke krijuar një “mbipopullim” në këtë repart dhe duke e bërë konkurrencën më të ashpër se kurrë.
Në krye të listës qëndron Marko Alia, i cili sezonin e kaluar ishte zgjedhja kryesore mes shtyllave dhe ka fituar besimin e stafit falë paraqitjeve të sigurta. Edhe këtë vit, ai shihet si një ndër pretendentët kryesorë për vendin e titullarit.
Një tjetër alternativë është Kristiano Rroku, një portier i ri e me potencial të madh, por që deri tani ka pasur pak mundësi për të luajtur dhe ka nevojë për më shumë minuta për të shfaqur vlerat e tij.
Skuadrës i është shtuar së fundmi edhe Amarildo Dervishaj, i cili vjen nga një eksperiencë me Kukësin. Ai shihet si një opsion serioz për rolin e titullarit, në varësi të formës që do të tregojë gjatë fazës përgatitore.
Në grup është futur edhe talenti i ri Demirshaj, që vjen nga ekipi kampion i Skënderbeut U-19. Ai konsiderohet një nga portierët më premtues të akademisë dhe grumbullimi me ekipin e parë është një hap i madh për karrierën e tij.
Përballë këtij “trafiku” në portë, stafi teknik i Skënderbeut duhet të marrë vendime të rëndësishme në javët në vijim për të përcaktuar hierarkinë dhe për të zgjedhur se kush do të mbrojë portën si titullar në sezonin e ri.
