Shërbimet e Drejtorisë Vendore për Kufirin dhe Migracionin Korçë kanë goditur një tjetër rast të tentativës për kalim të paligjshëm të kufirit, falë bashkëpunimit të ngushtë me inteligjencën informative.
Gjatë kontrolleve të ushtruara në Pikën Kufitare Qafë Thanë, u ndaluan tre shtetas nga Sri Lanka, të cilët tentuan të kalonin kufirin me dokumente të dyshuara si të falsifikuara. Pas verifikimeve, rezultoi se secili prej tyre posedonte leje qëndrimi në Itali që dyshohet se janë të falsifikuara.
Të arrestuarit në flagrancë janë: N. L., 57 vjeç, A. K., 51 vjeç, K. W., 36 vjeç, të tre me banim në Sri Lanka. Ata akuzohen për veprën penale “Falsifikimi i letërnjoftimeve, i pasaportave ose i vizave” dhe materialet përkatëse i janë referuar Prokurorisë për veprime të mëtejshme.
Në një tjetër rast, në vijim të punës së strukturave të DVKM Korçë, shërbimet e Policisë Kufitare kapën në flagrancë një shtetas që po tentonte të kalonte ilegalisht kufirin në zonën e fshatit Goricë, Pogradec.
Shtetasi M. B., 37 vjeç, banues në fshatin Grabovicë, u procedua penalisht për veprën “Kalimi i paligjshëm i kufirit shtetëror.”
Materialet procedurale për të dy rastet janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për ndjekje të mëtejshme ligjore.
