Struktura të ndryshme të Policisë së Shtetit në qarkun e Korçës kanë finalizuar dy operacione të koduara “Route 2” dhe “Qatromi”, duke goditur veprimtarinë kriminale të dhënies së ndihmës për kalim të paligjshëm të kufirit ndaj emigrantëve nga vendet e treta, ngjarje për të cilat janë arrestuar dy shtetas 21-vjeçarë.
Ndjekja nga Devolli në Pogradec në operacionin “Route 2”
Operacioni i parë, i koduar “Route 2”, u realizua nga Shërbimet e Drejtorisë Vendore për Kufirin dhe Migracionin Korçë në bashkëpunim me Komisariatin e Policisë nr. 6 Tiranë. Gjatë këtij aksioni u bë i mundur ndalimi i shtetasit me iniciale M. Sh., 21 vjeç, banues në Tiranë. Sipas njoftimit zyrtar të policisë, i dyshuari u pikas fillimisht në fshatin Tren të Devollit, ku po transportonte me automjet 5 emigrantë të paligjshëm. Ai nuk i është bindur urdhrit të efektivëve për të ndaluar dhe është larguar me shpejtësi. Gjatë ndjekjes në aksin rrugor Korçë-Pogradec, në fshatin Gurishtë, 21-vjeçari ka braktisur mjetin dhe ka ikur në këmbë, por pas disa orësh kërkimesh është lokalizuar dhe prangosur në Tiranë.
Baza në Qatrom dhe kapja në flagrancë nga forcat “Shqiponja”
Paralelisht, Specialistët e Seksionit për Hetimin e Trafiqeve të Paligjshme pranë DVP Korçë, në bashkëpunim me forcat e posaçme “Shqiponja” dhe nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Korçë, finalizuan pas një hetimi disajavor me metoda proaktive operacionin “Qatromi”. Në kuadër të këtij hetimi u arrestua në flagrancë shtetasi S. D., 21 vjeç, banues në fshatin Libonik të Maliqit.
Nga hetimet e kryera rezulton se i dyshuari ndihmonte shtetasit e huaj duke i strehuar fillimisht në një ndërtesë të braktisur në fshatin Qatrom të Korçës, e më pas i transportonte me automjet drejt Tiranës kundrejt pagesës monetare. Në momentin e ndërhyrjes së shërbimeve të policisë, i riu ka tentuar t’i ikë kontrollit duke braktisur mjetin ku ndodheshin 6 emigrantë nga vendet e treta, por është kapur nga efektivët disa metra më tutje. Materialet procedurale i kanë kaluar Prokurorisë së Korçës për veprat penale “Ndihma për kalim të paligjshëm të kufijve” dhe “Mosbindja ndaj urdhrit të punonjësit të policisë së rendit publik”.
