Skënderbeu ka nisur që prej datës 25 qershor përgatitjet për sezonin e ri futbollistik 2025-2026, me synimin për të ndërtuar një skuadër edhe më konkurruese. Trajneri Ernest Gjoka, në një deklaratë për mediat lokale, ka bërë të ditur se do të mbajë në dispozicion boshtin e skuadrës nga sezoni i kaluar, gjë që sipas tij është një avantazh i madh krahasuar me një vit më parë.
“Pjesa më e madhe e lojtarëve që ishin prej javës së parë të sezonit të shkuar do të jenë përsëri me ne. Kjo është diçka pozitive dhe situata është krejt ndryshe nga viti i kaluar,” u shpreh Gjoka.
Skuadra korçare planifikon të jetë aktive në merkato, si në hyrje ashtu edhe në dalje. Klubi është i gatshëm të negociojë shitjen e lojtarëve, për sa kohë ofrohen kushte të mira financiare. Shembulli më i fundit është transferimi i Ermir Rashicës te skuadra ukrainase Metalist 1925, për një shifër rreth 800 mijë euro.
Në anën tjetër, Skënderbeu ka siguruar dy përforcime deri tani: sulmuesin ganez Baba Hamdu Musa dhe mesfushorin Salim Abubakar.
Gjoka theksoi gjithashtu: “Kemi vendosur të afrojmë disa futbollistë nga akademia, që kanë mbyllur sezonin ose sezonet e kaluara. Paralelisht, jemi duke punuar për të sjellë edhe disa lojtarë të huaj. Për momentin nuk kemi firmosur me asnjë tjetër, por presim lëvizje në ditët në vijim.”
Ndërkohë, disa lojtarë janë larguar nga ekipi. Zhoao Felipe, Liridon Balaj, Mamane Amadou Sabo dhe Elvis Prençi nuk do të jenë më pjesë e Skënderbeut në sezonin e ardhshëm.
