Erald Fejzulla, këshilltar i Partisë Agrare Ambientaliste, ka reaguar lidhur me situatën e rëndë të shkaktuar pas reshjeve të dendura të shiut të shoqëruara edhe me breshër ku u dëmtua mundi i shumë fermerëve.
“Situata e reshjeve të dendura, të shoqëruara edhe me breshër kaloi, por për fat të keq la pasojat e veta. Shumë fermerë lanë prapa mundin e një viti pune, duke venë në diskutim ekzistencën e tyre në një vend ku vërtet gjen vend shprehja “Bujqësia është shtëpi pa çati”. Unë personalisht e kuptoj se si ndihen pas një disfate të tillë, sepse jam vetë fermer dhe kam zgjedhur të investoj në ”një shtëpi pa çati”. Falë Zotit, unë nuk pata dëmtime, por jo të gjithë e kishin fatin tim.”
Ai thotë se ky problem është i përvitshëm dhe vëmendja zgjat vetëm 2-3 ditë pasi ndodh fenomeni.
“Ky problem është i përvitshëm dhe jemi mësuar tashmë me një vëmendje 2-3 ditë pasi ndodh fenomeni, pastaj çdo gjë harrohet dhe jeta vazhdon. Edhe sa do vazhdojë kjo histori, ku i kërkojmë fermerit të punojë tokën dhe në momentet e tij të vështira as hallin nuk ja qajmë? Edhe sa do vazhdojmë që të investojmë në një sektor kaq të rëndësishëm të ekonomisë dhe në fund thjesht të detyrohemi t’i lutemi Zotit? Unë personalisht do kërkoj që kjo situatë të marrë vëmendje.“
Fejzulla bëri thirrje që të ndihmohen fermerët dhe të blihen produktet vendase.
“Nëse fermerit nuk i gjendet dot çatia për shtëpinë e tij të rrënuar, të paktën të ndihmohet me një strehë. Fermeri nuk duhet të ngelet pa bukën e gojës dhe në mëshirë të fatit. Thirrja e fundit shkon për çdo qytetar të thjeshtë. Blini produkte vendase dhe mbështetni fermerët dhe përpunuesit vendas. Blini produktet e tyre, sepse përveçse janë shumë të mira, janë produkt i një sakrifice dhe mundi shumë të madh.”
