Drejtoria Vendore e Policisë Korçë vijon veprimet intensive për parandalimin dhe goditjen e rasteve të vjedhjeve në qytet dhe në njësitë administrative përreth.
Specialistët për Hetimin e Krimeve të Komisariatit të Policisë Korçë kanë ndaluar shtetasin A. A., 34 vjeç, banues në Korçë, i cili dyshohet se ka kryer disa vjedhje të produkteve të ndryshme në një market në lagjen nr. 6 të qytetit.
Po ashtu, është ndaluar shtetasi B. M., 47 vjeç, banues në fshatin Vloçisht, pasi dyshohet se ka vjedhur pllakat e mermerit nga disa varre në varrezat e reja të Korçës. Materiali i vjedhur është gjetur dhe sekuestruar si provë.
Ndërkohë, Specialistët për Hetimin e Krimeve në Komisariatin e Policisë Maliq kanë referuar materialet në Prokurori dhe kanë nisur procedim penal për shtetasin F. R., 73 vjeç, banues në fshatin Symis, i dyshuar për vjedhjen e një biçiklete që i përkiste një 75-vjeçari në qytetin e Maliqit.
Policia vijon hetimet për dokumentimin e plotë ligjor të këtyre rasteve dhe për kapjen e shtetasit të shpallur në kërkim.
