Operacioni “Grupi” çon në pranga dy financues dhe shpall në kërkim dy organizatorë të trafikut të drogës
Drejtoria Vendore e Policisë Korçë ka finalizuar me sukses operacionin policor të koduar “Grupi”, të zhvilluar nga specialistët për Hetimin e Narkotikëve, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Korçë.
Hetimet e thelluara me metoda proaktive çuan në identifikimin e katër personave si pjesë e një rrjeti të strukturuar kriminal që merrej me kultivimin, përpunimin dhe trafikimin e lëndëve narkotike. Aktiviteti i tyre zhvillohej në fshatin Polovisht të Maliqit, ku kultivohej kanabisi, dhe më pas në fshatin Voskop të Korçës, ku lënda narkotike përpunohej e përgatitej për trafik drejt Greqisë.
Në kuadër të këtij operacioni u arrestuan dy financuesit e këtij aktiviteti kriminal:
- L. XH., 45 vjeç, banues në Maliq
- G. M., 48 vjeç, banues në Korçë
Ndërkohë janë shpallur në kërkim dy organizatorët:
- R. B., 42 vjeç
- A. G., 35 vjeç, të dy banues në Korçë
Të dy këta shtetas janë të dyshuar si organizatorë edhe të katër rasteve të mëparshme të goditura nga Policia, që lidhen me trafik ndërkombëtar droge. Ngjarjet përfshijnë sekuestrime të sasive të mëdha të lëndëve narkotike, që kapin një total prej mbi 96 kg, kryesisht kanabis dhe heroinë.
Gjatë kontrolleve, në cilësinë e provave materiale u sekuestruan: Uniforma policie, GPS, pajisje gjurmimi dhe përgjimi, kamera të fshehta, drone, USB, laptopë, kontrata automjetesh, si dhe një ambient i përshtatur për modifikimin e mjeteve, zbuluar në banesën e njërit prej të shpallurve në kërkim.
Operacioni vijon për identifikimin e të gjithë personave të përfshirë në këtë veprimtari kriminale të strukturuar.
Materialet procedurale i janë referuar Prokurorisë për veprat penale:
- “Prodhimi dhe shitja e narkotikëve”
- “Kultivimi i bimëve narkotike”
- “Trafikimi i narkotikëve”
Hetimet vazhdojnë për dokumentimin e plotë të këtij rrjeti kriminal, me qëllim çmontimin e të gjithë strukturës që vepronte në juglindje të vendit dhe përtej kufirit.
