Afishohen listat e votuesve të vlefshme për zgjedhjet parlamentare të 11 majit. Në ndryshim nga vitet e kaluara listat për qytetin e Korçës janë afishuar pranë bashkisë Korçë dhe për fshatrat pranë njësive administrative ku bëjnë pjesë.
Në të gjithë bashkinë e Korçës aktualisht janë 110 262 zgjedhës nga të cilët 75 955 në qytetin e Korçës, ndërsa janë në total 158 qendra votimi nga të cilat 101 janë në qytetin e Korçës. Pritet që në qytet të bëhen 103 qendra votimi për shkak se dy qendra kanë numër më të madh se 1000 votues dhe duhet të ndahen.
Të gjithë qytetarët që kanë të drejtë vote mund të verifikojnë emrin në listat zgjedhore të afishuara pranë bashkisë apo njësive administrative por një gjë të tillë mund ta bëjnë edhe në portalin e-albania, në faqen e KQZ-së, apo edhe në faqen zyrtare të Ministrisë së Brendshme.
Numri i votuesve pritet të ndryshojë në vazhdim për shkak të regjistrimit të votuesve të diasporës, të cilët do të hiqen nga listat e afishuara aktualisht.
Gjithashtu janë edhe 180 persona me moshë 100 vjeç, të cilët në rast se nuk paraqesin kërkesë për të votuar do të bllokohen nga sistemi dhe nuk do të kenë të drejtë vote.
