Një zjarr ka përfshirë sot një sipërfaqe në fshatin Vërnik të Devollit, duke shkaktuar dëme të konsiderueshme materiale. Flakët, të cilat shpërthyen pranë një zone të banuar, kanë shkrumbuar plotësisht një stallë bagëtish, ndërsa rrezikonin të përhapeshin edhe në godina të tjera përreth.
Falë reagimit të menjëhershëm të shërbimit zjarrfikës, të cilët mbërritën me tre mjete dhe dhjetë efektivë, u arrit të shpëtohen gjashtë stalla të tjera, shkolla e fshatit dhe banesat pranë vatrës së zjarrit.
Policia ndodhet në vendngjarje dhe po punon për zbardhjen e plotë të rrethanave dhe shkaqeve që çuan në përhapjen e flakëve, ndërsa autoritetet lokale u kanë bërë apel banorëve të tregojnë kujdes të shtuar për të shmangur situata të ngjashme, veçanërisht në këto ditë me temperatura të larta dhe rrezik të shtuar për zjarre.
