Rastet e zjarrvënies nga pakujdesia janë shtuar në qarkun e Korçës, ku disa ngjarje kanë përfshirë zona me bimësi dhe objekte private.
Në fshatin Dishnicë, bashkia Korçë, shtetasi E. B., 28 vjeç (me probleme të shëndetit mendor), dyshohet se ka ndezur zjarr, duke shkaktuar djegien e një sipërfaqeje toke me bimësi.
Po në Korçë, 75-vjeçari M. Q. u procedua penalisht pasi dyshohet se ndezi zjarr për të djegur mbetje, duke shkaktuar ndotje të ajrit.
Një tjetër zjarr u regjistrua në fshatin Vërnik, bashkia Devoll, ku shtetasi V. A., 79 vjeç, nga pakujdesia, dyshohet se shkaktoi përhapjen e flakëve që dogjën një sipërfaqe me bimësi.
Ndërkohë, një zjarr aksidental ra në një magazinë në fshatin Vloçisht, bashkia Maliq, në pronësi të shtetasit R. N., rreth orës 08:30 të mëngjesit. Si pasojë, u shkaktuan dëme materiale, ndërsa grupi hetimor po punon për zbardhjen e rrethanave.
Autoritetet kanë intensifikuar hetimet për çdo rast dhe i kanë kaluar dosjet përkatëse në Prokurori për veprime të mëtejshme.
