Situata e zjarreve në territorin e Qarkut Korçë paraqitet e stabilizuar, falë ndërhyrjes së strukturave të Emergjencave Civile dhe bashkëpunimit ndërinstitucional në terren. Prefektura e Qarkut Korçë bën me dije se të gjitha vatrat aktive janë neutralizuar dhe aktualisht nuk paraqitet rrezik për përhapje të mëtejshme.
Sipas informacioneve zyrtare, janë kryer ndërhyrje të suksesshme në tre zona problematike:
Fshati Strelcë, Nj.A. Gorë, Bashkia Maliq – Vatra është shuar plotësisht dhe vijon të monitorohet nga forcat vendore.
Zona midis fshatrave Dishnicë dhe Barç, Nj.A. Bulgarec, Bashkia Korçë – Situata është e qëndrueshme dhe në mbikëqyrje nga sektori i shërbimit pyjor.
Fshati Lajthizë, Bashkia Pustec – Në zonën e sipërme të fshatit, zjarri është vënë nën kontroll. Ndonëse ka prani tymi, ajo ndodhet brenda perimetrit të djegur dhe nuk përbën rrezik për përhapje.
Gjatë datës 27 Korrik, në operacionet për shuarjen e zjarrit në Parkun Kombëtar të Prespës janë angazhuar 64 forca nga strukturat zjarrfikëse dhe pyjore.
Për datën 28 Korrik, prej orës 05:00 të mëngjesit, është planifikuar ndërhyrja përfundimtare në Lajthizë me një total prej 51 forcash të angazhuara:
- 13 nga ADZM
- 13 nga MZSH
- 25 ushtarakë nga reparti nr. 1033
Monitorimi dhe ndërhyrjet do të vijojnë deri në shuarjen përfundimtare të çdo vatre, me qëllim garantimin e sigurisë në zonat e mbrojtura dhe komunitetet përreth.
