Në kuadër të 205-vjetorit të lindjes së rilindasit dhe patriotit Thimi Mitko (1820–2025), Biblioteka Publike “Thimi Mitko”, në bashkëpunim me Bashkinë e Korçës dhe Bibliotekën Kombëtare, organizoi sot sesionin shkencor me temë “Thimi Mitko – Ndriçues i mendimit kombëtar dhe i kulturës shqiptare”.
Drejtoresha e bibliotekës, Jorida Tollkuçi, e cilësoi aktivitetin si një nderim të veçantë për figurën dhe kontributin e Thimi Mitkos në trashëgiminë kulturore shqiptare. Ndërkohë, Jola Tasellari, kryebibliografe dhe kuratore e ekspozitës, si përfaqësuese e Bibliotekës Kombëtare, theksoi rëndësinë e dokumentimit dhe studimit të veprës së tij për gjeneratat e reja.
Në kuadër të sesionit u çel edhe një ekspozitë dokumentare dhe bibliografike, me titull “Thimi Mitko – 205 vite trashëgimi”, që solli për vizitorët libra, dokumente dhe studime kushtuar jetës dhe veprës së tij.
Ky aktivitet u konsiderua një moment vlerësimi dhe reflektimi mbi figurën e Thimi Mitkos, një ndër personalitetet më të rëndësishme të mendimit dhe kulturës shqiptare.
