Sot shënohen 82 vite nga masakra më e madhe e kryer nga nazistët gjermanë kundër popullsisë civile shqiptare, kur një divizion gjerman shkatërroi fshatin Borovë në Kolonjë, duke lënë pas 107 viktima, mes tyre shumë gra dhe fëmijë.
Në përkujtim të kësaj ngjarjeje tragjike, gjermani Ulrich Chilian, i cili ka vizituar disa herë Borovën, shprehu sërish ndjesën e tij në emër të popullit gjerman. Ai theksoi se e ndjen të domosdoshme të vijë për të nderuar viktimat dhe për të kërkuar falje, pavarësisht vështirësisë që sjell peshë e së kaluarës, duke shtuar se sot Gjermania dhe Shqipëria janë dhe do të mbeten vende mike.
Në këtë përvjetor, të pranishëm ishin edhe banorë të zonës, të cilët treguan me lot në sy humbjen e motrave, vëllezërve dhe familjarëve të tyre gjatë masakrës.
Nga ana tjetër, kryetari i Bashkisë Kolonjë, Erion Isai, e krahasoi mizorinë e Borovës me tragjeditë që ende përjeton bota sot, ku, siç u shpreh ai, fati i jetës së njeriut përcaktohet nga dora e njeriut dhe jo nga Zoti.
Viktimat e Borovës janë shpallur Dëshmorë të Atdheut dhe çdo 6 korrik, familjarë, banorë të zonës dhe përfaqësues shtetërorë mblidhen për të kujtuar këtë ngjarje dhe për të nderuar kujtimin dhe sakrificën e tyre.
