Shefki Kordalli nga Bilishti është për momentin banori më i vjetër i këtij qyteti. 97 vitet që ka mbi supe duket se janë thjesht numra për të.
Për çdo ditë ai del nga banesa e tij dhe nuk kthehet pa përshkuar të paktën 5 km ecje.
Në shumicën e rasteve bashkëshoqërues ka vetëm shkopin e tij që e mban për çdo rast. Për të ecja e përditshme është arsyeja kryesore që e mban në formë prej më shumë se tre dekadash.
“Kam 30 vjet që eci në këtë rrugë cdo ditë, e bëj vetëm, nuk kam shokë të tjerë që të ecin si unë, por unë e bëj me dëshirë se ndryshe po nuk e bëra e di që do të zeë krevatin” thotë Shefkiu.
Madje edhe në këtë moshë të sfidon të ecësh me të. I biri tregon se babai i tij nuk ka pirë asnjë ilaç edhe pse po i afrohet të 100-tave.
“Ai nuk është i sëmurë, nuk pi asnjë lloj ilaci, nuk vuan as nga zemra as nga tensioni. E shoh kur ecën edhe kur ngjitet në malorë ai ka frymëmarrje të rregullt” thotë djali Agron Kordalli.
Përveç ecjes që bën, Shefkiu të tregon edhe për rininë e tij në kohën kur ka qenë valltar i asamblit të Devollit, dhe ruan kujtime të bukura nga ajo kohë në turnetë kombëtare dhe ndërkombëtare që ka bërë.
“Kam qenë pjesë e Ansamblit Devolli, kemi qenë me koncerte në të gjithë Shqipërinë, madje deri edhe në Moskë në Festivalin botëror, atje kemi marrë shumë vlerësime të mëdah, dëgjonim që na duartrokisnin dhe thërrisnin Shqipëri, Shqipëri”
Si për të vërtetuar që mosha e tij është thjesht një numër, Shefkiu na konfirmon në fund të intervistës formën e tij duke ecur dhe duke thënë se do vijojë ta bëjë ecjen prej 5 km cdo ditë të jetës së tij.
burimi A2 CNN
