Festat e fundvitit po zbrazin kryeqytetin dhe po mbushin qytetet e vogla. Me qindra njerëz largoheshin dje nga Tirana, në drejtim të juglindjes.
Sot qyteti i Pogradecit gëlon nga zhurmat e turistëve që kanë pushtuar pedonalen dhe shijojnë kafenë buzë liqenit. Temperaturat e ulta, me diell dhe pa erëra kanë nxjerrë njerëz në të gjitha rrugët e qytetit.
Xhensil Shkëmbi ka pasqyruar në rrjetin e tij social facebook foto me pamje të Pogradecit të mbushur me fytyra të qeshura.
Statusi në facebook;
Pogradeci i shëtitores bosh në dimër, i restoranteve që mbylleshin në fund të Shtatorit, i zymtësisë, vitet e fundit ka ndryshuar tërësisht.
Fundjavave qëndroj përherë në Kolonjë ose Pogradec. Më qetëson Mali i Gramozit dhe Mali i Thatë. Por lumturi si sot, teksa qëndroja në Pogradec, nuk kisha ndjerë ndonjëherë.
M’u desh që makinën ta lë ne “Oktapodi” sepse nuk kishte asnjë vend të lirë për të parkuar. Në “Bar Pelikani” m’u desh të rrija në pritje 10 minuta që të lirohej tavolinë për të pirë kafe, në diellin që ngrohte sot, me pamjen e Malit të Thatë që në majë kishte dëborë e poshtë reflektonte në liqenin e pastër “xham”. Për të ngrënë shkoj përherë në “Cavos” por menaxheri po shtrëngonte buzën kur më pa.
“Vëlla, nuk kam ç’të të bëj. Mos më turpëro, i kam të gjitha të rezervuara. Në orën 3 lirohem” – nuk u mërzita në fakt. Mora një bugaçe me sallam në dorë, eca në ajo shëtitorja që dikur veç hapa pleqsh rastisje e po më shijonte pafund. Mbase jo vetëm ajo bugaçja më shumë sesa pamja, me turistë nga Kosova, kishin marrë fëmijët. Njëri prej tyre donte të merrte qenin e rrugës, që ishte i sjellshëm me turistët, edhe pse u kishte kafshuar topin dhe nuk u’a lëshonte.
Dy vajza të reja merreshin me telefon, ulur në stolat me formë mjelme e nuk i bezdiste askush, veç dielli që i binte në telefon.
Pogradeci sot është i një tjetër niveli, e duhet të fillojë të mendojë jo më për mbijetesë, por për rritjen e cilësisë në çdo sektor. Të krijojë e një parkim nëntokë. Biznesmenët të investojnë e njerëzit të kthehen.
Të paktën, pamja sot, këtë më thotë…
