60 vjetori i krijimit të Muzeut Historik në Pogradec ka ardhur përmes një aktiviteti që ofroi një pasqyrë të zhvillimit të muzeut, që nga hapja e tij e deri në ditët e sotme, duke nxjerrë në pah vlerat e tij kulturore dhe historike për qytetin dhe rajonin.
Ndër vite fondi i muzeut është pasuruar me objekte e materiale të ndryshme teksa risia më e fundit është instalacioni i palafiteve, një atraksion i ri që ofron një eksperiencë të veçantë për vizitorët.
“Krahas pasqyrimit historik, në këtë aktivitet u vlerësuan me “Certifikata Mirënjohjeje” emra të cilët kanë dhënë kontributin e tyre në ruajtjen dhe pasurimin e muzeut” – tha Friseda Tola, Drejtore e muzeut.
“Muzeu Historik i Pogradecit ka qenë, është dhe mbetet një nga pasuritë më të mëdha të qytetit pasi pasqyron etapat e ndryshme të historisë tonë që nga lashtësia e deri në ditët e sotme”- u shpreh Entela Gusho, Nënkryetare e Bashkisë Pogradec.
