Tetori i vitit 2024 shënon një hap të rëndësishëm në zhvillimin e Korridorit 8, me punimet intensive për ndërtimin e rrugës së re Elbasan-Librazhd në kthesat e Murrashit. Ky segment është cilësuar si një nga pikat më të vështira për shkak të terrenit të thyer dhe rrezikut të vazhdueshëm nga rrëshqitjet e gurëve, që bllokojnë shpesh rrugën ekzistuese.
Punimet për ndërtimin e tunelit të parë kanë filluar dhe po vijojnë në këtë zonë kritike prej 2-3 kilometrash, ku pritet të hapen dy tunele për vajtje-ardhje me një gjatësi prej rreth 500 metrash secili. Për momentin, vetëm njëri prej tuneleve është në fazën fillestare të hapjes, ndërsa tjetri do të nisë së shpejti.
Sipas skemës së zhvillimit, rruga do të kalojë përmes tuneleve për të shmangur rrezikun nga gurët, ndërsa në segmentet e tjera do të ketë ndërtimin e urave që do të lidhin rrugën sipas vijave të projektuara. Hyrja për tunelin e trenit, i njohur si “Tuneli i Murrashit nr. 1”, shënohet me hark të verdhë dhe aktualisht është i bllokuar për shkak të punimeve.
Linja hekurudhore në këtë zonë është ndërprerë për më shumë se 7 vite për shkak të amortizimit të saj dhe mungesës së sigurisë. Ndërprerja e shërbimit për një periudhë kaq të gjatë ka bërë që punimet në këtë rrugë të përparojnë pa pengesa nga hekurudha. Hyrja e trenit do të rihapet pas përfundimit të punimeve, duke sjellë edhe njëherë në vëmendje rehabilitimin dhe modernizimin e linjave hekurudhore.
Projekti i rrugës së re Elbasan-Librazhd është pjesë e një nisme më të madhe për të përmirësuar qarkullimin dhe sigurinë përgjatë Korridorit 8, duke e shndërruar atë në një arterie kryesore transporti mes lindjes dhe perëndimit të vendit.
