“Mundësi pa kufi”, një koncert muziko-teatral ideuar dhe performuar nga motrat artiste Blerina dhe Alda Shalari do të ngjitet për herë të parë në skenën e teatrit “Andon Zako Çajupi” në Korçë këtë fundjavë.
Dy motrat, që e humbën shikimin në fëmijëri, ushqyen me vite talentin dhe pasionin, për muzikën dhe sot sfidojnë vështirësitë duke u ngjitur në skenat artistike.
Pikërisht për këtë koncerti ka marrë emrin “Mundësi pa Kufi”, pasi ka njerëz të cilët kanë prirje arti, por jo të gjithëve u jepet mundësia të ngjiten në skenë. Motrat Shalari prej vitesh e bëjnë këtë jo vetëm për vete, por për të gjithë ata që duhet të sfidojnë vetveten, e që janë në kushte të ngjashme me to, duke shërbyer kështu edhe si një mundësi frymëzimi.
I ftuar special në mbrëmjen e motrave Shalari do të jetë edhe aktori i Teatrit Kombëtar, Dritan Boriçi i cili do të interpretojë melodramën “Homeriada”, shkruar prej Blerinës.
Ky koncert është një mundësi unike për të përjetuar artin në formatin e tij më të plotë dhe emocionues. Pasi ka bërë rrugëtimin e tij në disa qytete të vendit, tashmë koncerti i motrave Shalari, do të mbahet në teatrin e Korçës të shtunën e 25 janarit në orën 19:00.
