Unë jam Kesjana Iberhasaj, kandidate për deputete në qarkun Korçë me lëvizjen Shqipëria Bëhet. Jam lindur në Korçë, por që në moshën 8-vjeçare u detyrova të largohem nga Shqipëria për arsye shëndetësore, pasi u diagnostikova me leucemi – një betejë të cilën e fitova falë sistemit shëndetësor italian.
Sot jetoj në Itali, jam e diplomuar në Ekonomi-Biznes dhe menaxhere e një rrjeti pastiçerish. Kam ndërtuar jetën time me punë dhe përkushtim, por zemra ime ka mbetur gjithmonë në Shqipëri.
Vendosa të kandidoj për deputete në zgjedhjet e 11 Majit, sepse historia ime personale është simboli i asaj që shumë shqiptarë përjetojnë çdo ditë: mungesë shërbimesh, mungesë shprese, dhe largim nga vendi. Unë besoj se politika ka nevojë për zëra të rinj, për njerëz që vijnë nga jeta reale, që e njohin dhimbjen, sfidën, dhe që kanë vullnetin të bëjnë ndryshimin.
Qëllimi im është i qartë:
Të ndërtoj një Shqipëri që nuk të detyron të largohesh për të mbijetuar.
Do të jem zëri i qytetarëve të thjeshtë në Parlament, veçanërisht i të rinjve, grave, familjeve që përballen çdo ditë me padrejtësi.
Kauzat që mbroj janë:
• Shëndetësi moderne dhe të barabartë për të gjithë
• Mundësi për të rinjtë, këtu në Shqipëri
• Arsim cilësor dhe punësim dinjitoz
• Mbështetje për sipërmarrjen
• Mbrojtje të mjedisit dhe trashëgimisë kulturore
Unë nuk premtoj mrekulli. Por premtoj përkushtim, ndershmëri dhe një zë që nuk do të heshtë përballë padrejtësisë.
Më 11 Maj, voto për një zë të ri! Voto për Kesjana Iberhasaj dhe për Shqipëria Bëhet, sepse Shqipëria vlen më shumë se çdo parti!
