Trajneri i skuadrës së volejbollit për femra të Pogradecit, Besnik Lisha, do të vijojë të drejtojë ekipin edhe për sezonin 2025-2026. Konfirmimi është bërë nga drejtori i Qendrës Multifunksionale, Dorian Latifllari, i cili deklaroi se bashkëpunimi me trajnerin do të vazhdojë edhe për një vit tjetër, në vijim të projektit për ngritjen e mëtejshme të skuadrës.
Pogradeci mbylli sezonin e kaluar në mënyrë dinjitoze, duke u ndalur vetëm në gjysmëfinale nga Skënderbeut, në një seri të fortë që u vendos në ndeshjen e tretë me set final, në favor të skuadrës korçare. Megjithatë, paraqitjet e mira dhe progresi i vazhdueshëm e bindën klubin për të vijuar me të njëjtin staf teknik.
Burime pranë klubit bëjnë me dije se pas rinovimit me Lishën, priten edhe disa përforcime të rëndësishme në organikën e ekipit. Objektivi është ndërtimi i një skuadre më konkurruese, me afrime cilësore si nga tregu vendas, ashtu edhe nga ai ndërkombëtar. Disa emra të njohur janë përmendur tashmë në listën e dëshirave të drejtuesve.
Qyteti i Pogradecit, me një traditë në sportin e volejbollit, shpreson që në sezonin e ardhshëm ekipi të arrijë të kapë finalen dhe të luftojë për titullin kampion, por dhe trofe te tjera.
ZYRTARE!
Klubi i Volejbollit të femrave Pogradec, ka kënaqësinë të njoftojë nënshkrimin për vazhdimin e kontratës me Trajnerin Besnik Lisha për sezonin sportiv 2025-2026
Suksese!
