Në kuadër të aktiviteteve të Javës së Evropës 2025, qyteti i Korçës mirëpriti Ambasadorin e Bashkimit Evropian në Shqipëri, z. Silvio Gonzato. Gjatë kësaj vizite, ai u shoqërua nga kryetari i bashkisë, Sotiraq Filo, në disa nga pikat më përfaqësuese kulturore të qytetit dhe në projektet që janë realizuar falë mbështetjes së BE-së.
Vizita kishte për qëllim njohjen më të thelluar me investimet që kanë ndikuar në transformimin dhe zhvillimin e qëndrueshëm të Korçës. Në takimin zyrtar u prezantua puna e bërë ndër vite për modernizimin e qytetit dhe përmirësimin e cilësisë së jetës së qytetarëve.
Pjesë e diskutimeve ishin edhe sfidat aktuale dhe mënyrat konkrete për të forcuar bashkëpunimin mes institucioneve vendore dhe Bashkimit Evropian.
Kjo vizitë u vlerësua si e rëndësishme dhe frytdhënëse, ndërsa pritet të pasohet nga hapa të tjerë konkretë në funksion të zhvillimit të mëtejshëm të qytetit të Korçës.
