Në ambientet e Muzeut Historik dhe Etnografik të qytetit të Ersekës, nxënësit e klasës së katërt të shkollës 9-vjeçare “Papa Kristo Negovani”, nën kujdesin e mësueses Drita Oçelli, zhvilluan një orë mësimore ndërdisiplinore, ku u ndërthurën historia, kultura dhe arti pamor.
Gjatë aktivitetit, fëmijët patën mundësinë të njiheshin nga afër me objektet arkeologjike të zbuluara në zonën e Kolonjës, duke u njohur me vlerat historike dhe kulturore të trashëgimisë së krahinës. Më pas, në një atmosferë krijuese dhe të lirshme, ata rikrijuan përmes vizatimeve dhe punimeve të tyre objektet që i tërhoqën më shumë.
Ky aktivitet kishte si synim afrim të brezit të ri me trashëgiminë kulturore të vendit, përmes një qasjeje interaktive dhe argëtuese që nxit të mësuarit përmes përvojës dhe krijimtarisë.
Aktivitete të tilla jo vetëm që thellojnë njohuritë e nxënësve, por edhe i motivojnë ata të jenë më të lidhur me historinë dhe kulturën vendase.
