Ish-drejtuesi i policisë, Krenar Ahmeti, ka denoncuar shpenzimet e qeverisë gjatë mbledhjes së fundit të zhvilluar në Pogradec, duke pretenduar se kostoja e këtij aktiviteti kap shifrën e 1.5 milionë eurove. Gjatë fjalës së tij përpara godinës së Kryeministrisë, Ahmeti kritikoi ashpër menaxhimin e parave publike nga mazhoranca, duke e cilësuar këtë shpenzim si të papërgjegjshëm në raport me nevojat e qytetarëve.
Sipas Ahmetit, fondet e përdorura për aktivitetin politik në qytetin liqenor do të mjaftonin për investime jetike në arsim. “Vetëm zhvendosja e mbledhjes së qeverisë dhe PS-së në Pogradec minimumi u ka kushtuar 1.5 milionë euro. Me këto para do të ishte bërë një shkollë ku të paktën 1000 fëmijë do të ishin brenda parametrave për të studiuar. Por sa abuzime të tilla bëhen?” deklaroi ai gjatë protestës.
Kritika për sigurinë rrugore dhe thirrja për qëndresë
Përveç shpenzimeve për takimet politike, Ahmeti u ndal edhe te gjendja e sigurisë rrugore në vend, duke e lidhur mungesën e investimeve me rritjen e aksidenteve. Ai theksoi se rrugët po përgjaken çdo ditë dhe ngriti pyetjen se si është e mundur që nuk garantohet siguria në trafik, ndërkohë që qytetarët mbeten të rrezikuar në çdo sekondë.
Aktivisti bëri thirrje për masivizim të protestës, e cila sipas tij ka hyrë në muajin e tretë të rezistencës. “Kemi 2 muaj e gjysmë rezistencë, edhe më tepër do të rezistojmë! Kam vetëm një thirrje për këtë shesh: Ka vetëm një zgjidhje! Të gjithë, vetëm në shesh, nuk ka zgjidhje tjetër nëse doni ta zhdukim këtë klikë që i ka pirë gjakun mbi 36 vite këtij vendi! Prandaj burra e gra, vendin mos e lëshoni!” përfundoi Krenar Ahmeti.
