Është mbyllur zyrtarisht afati për aplikimet në skemat kombëtare të subvencioneve bujqësore, ndërsa Qarku i Korçës ka rezultuar sërish një ndër qarqet me numrin më të lartë të aplikimeve në nivel kombëtar.
Sipas drejtorit të Agjencisë Rajonale të Ekstensionit Bujqësor Korçë, Vullnet Gjolla, interesi i fermerëve ka qenë i qëndrueshëm përgjatë gjithë periudhës së aplikimeve, të cilat këtë vit janë zhvilluar në një afat më të gjatë dhe më të lehtësuar krahasuar me vitet e mëparshme.
“Sivjet ka pasur një risi, ku afatet e aplikimit kanë qenë më të gjata. Kemi pasur afërsisht një muaj e gjysmë kohë dhe s’ka pasur dyndje nga fermerët. Vetëm për skemën e naftës janë regjistruar rreth 10,300 aplikime në Qarkun e Korçës, pothuajse në të njëjtat nivele me vitin e kaluar.”
Gjolla bëri të ditur se edhe skemat e tjera kanë pasur pjesëmarrje të konsiderueshme:
-Skema për bagëtitë e imëta: 680 aplikime
-Skema e blegtorisë: 690 aplikime
-Skema e bletarisë: 720 aplikime
Ky numër i lartë aplikimesh dëshmon për zhvillimin e qëndrueshëm të sektorit bujqësor në Qarkun e Korçës dhe për angazhimin e fermerëve në përfitimin e mbështetjes financiare që ofron shteti për rritjen e prodhimit dhe qëndrueshmërinë ekonomike në zonat rurale.
