Këtë të martë, më 3 qershor 2025, ka nisur zyrtarisht Matura Shtetërore me zhvillimin e provimit të parë, atë të gjuhës së huaj. Në Qarkun e Korçës, në total 1838 maturantë nga gjashtë bashki janë testuar në njohuritë e tyre për gjuhën e huaj.
Procesi ka nisur që në orët e para të mëngjesit me paraqitjen e nxënësve në qendrat e provimit, ku janë verifikuar mjetet e identifikimit dhe janë kryer kontrolle me detektor për pajisje teknologjike. Rreth orës 10:00 është bërë shpërndarja e tezave dhe më pas maturantët kanë vijuar me zgjidhjen e pyetjeve për një kohëzgjatje prej 2 orë e 30 minutash.
Pas përfundimit të testimit, shumë prej nxënësve janë shprehur se niveli i tezës ishte i përballueshëm dhe pyetjet ishin të një niveli mesatar.
Provimi i radhës në kalendarin e Maturës Shtetërore është ai i Gjuhës Shqipe dhe Letërsisë, i planifikuar për më 10 qershor. Më pas, më 17 qershor do të zhvillohet provimi i Matematikës, ndërsa më 24 qershor maturantët do të përballen me provimin me zgjedhje.
