Ambasadorja e Zvicrës në Shqipëri, znj. Ruth Huber, zhvilloi një vizitë në zonën arkeologjike të Linit, ku prej disa vitesh po realizohet një bashkëpunim shkencor mes arkeologëve zviceranë nga Universiteti i Bernës dhe ekspertëve shqiptarë të Institutit të Arkeologjisë. Gjatë vizitës, ajo theksoi rëndësinë e këtij projekti, duke nënvizuar se zbulimet e bëra jo vetëm pasurojnë njohuritë historike për liqenin e Ohrit, por kanë edhe një potencial të madh për zhvillimin e turizmit në rajon.
Ambasadorja vlerësoi gjithashtu shkëmbimin e përvojave dhe trajnimet e përbashkëta mes dy ekipeve, duke e cilësuar këtë bashkëpunim si një model suksesi në fushën e partneriteteve akademike dhe kulturore. Përsa i përket pyetjes lidhur me ndërprerjen e fondeve në sektorin e bujqësisë, Huber sqaroi se projekti në Lin financohet nga Universiteti i Bernës dhe se mbështetja zvicerane ndaj Shqipërisë në sektorin e zhvillimit mbetet e fortë dhe e vazhdueshme.
Në lidhje me procesin e integrimit të Shqipërisë në Bashkimin Europian, ajo theksoi se Zvicra, edhe pse jo anëtare e BE-së, mbështet fuqishëm këtë rrugëtim përmes projekteve zhvillimore. “Synojmë të ndihmojmë Shqipërinë në përmbushjen e standardeve të nevojshme dhe të forcojmë institucionet për të garantuar një progres të qëndrueshëm,” deklaroi ambasadorja Huber.
