Desara Shaholli, volejbollistja 16-vjeçare nga Korça, po spikat si një nga talentet më premtuese të ekipit të femrave të Skënderbeut këtë sezon. E angazhuar në fushën e volejbollit që në moshën 7-vjeçare, ajo ka ndërtuar një rrugëtim të suksesshëm, duke u shpallur kampione këtë sezon si me ekipin U-18, ashtu edhe me ekipin U-20.
Tashmë, Desara synon një hap të madh në karrierën e saj: sigurimin e vendit të titullares me ekipin e të rriturave në sezonin që vjen.
Trajnerët Haxhillari dhe Shishi po i kushtojnë vëmendje të veçantë zhvillimit dhe integrimit të volejbollisteve të reja që kanë dalë nga akademia korçare. Vitin e kaluar, disa prej tyre morën minuta me ekipin e parë, ndërsa këtë sezon pritet që roli i tyre të rritet ndjeshëm në parket.
Mes tyre bie në sy Desara Shaholli, e cila shihet si një alternativë serioze për rolin e liberos, një pozicion që kërkon përqendrim, shkathtësi dhe qetësi në lojë – cilësi që ajo i ka shfaqur me sukses në ndeshjet e ekipeve U-18 dhe U-20.
Stafi teknik beson fort në potencialin e këtij grupi vajzash, veçanërisht tek Desara, e cila me punë, disiplinë dhe përkushtim synon të lërë gjurmë në elitën e volejbollit shqiptar.
